Любоў да радзімы пачынаецца з павагі да роднага краю - месца, дзе нарадзіўся чалавек, яго малой радзімы. Таму вялікая ўвага настаўнікаў гімназіі надзяляецца фарміраванню грамадзянска-патрыятычных якасцей вучняў сродкамі краязнаўчага матэрыялу.
Мы цесна супрацоўнічаем з раённым краязнаўчым музеем, музеямі ўстаноў адукацыі Ганцавіцкага раёна. Штогод гімназісты прымаюць актыўны ўдзел у шматлікіх конкурсах краязнаўчага накірунку. І гэты навучальны год не стаў выключэннем. Пасля перамогі ў раённым этапе краязнаўчага конкурсу, вучні былі накіраваны ў горад Брэст для ўдзелу ў абласным краязнаўчым фестывалі.
Каманду гімназіі прадстаўлялі Вайцешык Анастасія, Лятко Аліна, Анішчанка Лізавета. Краязнаўчы фестываль - гэта мнагапрофільнае спаборніцтва лепшых краязнаўчых актываў Брэсцкай вобласці. У праграме фестывалю было запланавана правядзенне інтэрактыўных прэзентацый лепшых праектаў удзельнікаў краязнаўчага конкурсу, удзел вучняў у віктарыне “Апісанне музейнага экспаната”, у шматлікіх майстар-класах кіраўнікоў аб’яднанняў па інтарэсах краязнаўчага профілю.
Гімназісты не толькі прымалі актыўны ўдзел у мерапрыемствах фестывалю, але і дзяліліся сваім вопытам удзелу ў турысцка-краязнаўчай дзейнасці. Вайцешык Анастасія прадставіла інтэрактыўную экскурсію “Маршрут памяці па ваенна-гістарычных месцах Ганцавіцкага раёна” . Падчас падрыхтоўкі экскурсіі гімназістамі была праведзена вялікая пошукава-даследчая работа па вывучэнні гістарычных звестак, звязаных з Вялікай Айчыннай вайной на тэрыторыі Ганцаўшчыны. Вучаніцай распрацаваны экскурсійны маршрут, які адлюстроўвае асаблівасці жыцця ганцаўчан у ваенныя гады і змяшчае звесткі пра подзвігі нашых землякоў.
Па выніках удзелу ў краязнаўчым фестывалі Вайцешык Анастасія стала пераможцай у намінацыі “Юны захавальнік памяці”, а каманда гімназіі адзначана падзячным лістом ДУА “Брэсцкі абласны цэнтр турызму і краязнаўства дзяцей і моладзі”.
Асаблівую падзяку за дапамогу у падрыхтоўцы да ўдзелу ў фестывалі выражаем Кулеш Наталлі Уладзіміраўне, дырэктару раённага краязнаўчага музея і кіраўнікам музеяў устаноў адукацыі Ганцавіцкага раёна.
Анішчанка Н.В.,
намеснік дырэктара па ВР
ДУА "Гімназія г.Ганцавічы"