Вельмі важна навучыць сённяшніх дзяцей з павагай ставіцца да беларускай мовы, а таксама бегла на ёй размаўляць. Яны мала чуюць родную мову ў шырокім ужытку, а таму маюць бедны слоўнікавы запас, іх маўленне знаходзіцца пад уплывам рускай мовы. Хоць наша ўстанова i з’яўляецца рускамоўнай, але мы шмат увагi ўдзяляем развiццю менавіта беларускага маўлення дзяцей.
Кожны чацвер у ДУА «Яслі-сад № 2 г. Ганцавічы» з’яўляецца беларускамоўным днём, пачынаецца ён з прывітання на беларускай мове. Мэтай такога дня з’яўляецца фарміраванне ў дзяцей уяўленняў пра родны край і станоўчых зносіх да яго, развіццё беларускага маўлення і маўленчых зносін.
Так 17 верасня, пад кіраўніцтвам педагога Грэбень Ірыны Міхайлаўны ўстарэйшай групе прайшоў занятак па адукацыйнай галіне «Развіццё маўлення і культура маўленчых зносін» на тэму: «Падарожжа па Белавежскай пушчы». У ходзе занятку выхаванцы пашыралі веды пра Беларусь; замацоўвалі ўменні знаходіць на карце Беларусі рэкі, азёры і лясы; пазнаёміліся з запаведнікам «Белавежская пушча»; вучыліся называць па-беларуску жывёл, якія насяляюць беларускі запаведнік.
Мэта занятку заключалася ў тым, каб у займальнай форме далучаць дзяцей да беларускай культуры, а таксама выхоўваць любоў да сваёй Радзімы, адчуванне гонару за яе. Напрыканцы дзеткі разам са сваёй выхавальніцай прыйшлі да высновы, што менавіта родная зямля і з’яўляецца адным з самых галоўных нашых скарбаў.
Важна адзначыць, што ў выхаванцаў ёсць жаданне, а ў педагогаў – магчымасці. Разам мы можам зрабіць навучанне не толькі больш эфектыўным, але і больш радасным.
С.Г.Жук,
намеснік загадчыка
па асноўнай дзейнасці