Мой край

Мая зямля, мой родны дом

Завецца Беларуссю.

Я знаю: пад тваім крылом

Заўсёды прытулюся.

У час трывогі і бяды

З табою мы адзіныя,

З любоўю шчыраю заўжды

Заву цябе Радзімаю.

Валерыя Бароўская

Скарбы мовы, скарбы пазнання, скарбы навакольнага свету расчыняюцца тым, хто шчыра любіць і глыбока вывучае родную мову, літаратуру, культуру. Беларускамоўны дзень у дашкольнай установе дазваляе выхаванцам бліжэй пазнаеміцца са звычаямі беларускага народа і моўнымі сродкамі краіны, у якой яны нарадзіліся.

30 лістапада да дзяцей старэйшай групы завітала ў госці лялька Ганначка, каб паведаміць цікавыя звесткі пра Беларусь. Дзеці з задавальненнем гулялі ў гульні: “Мае сябры”, “Закончы сказ”, “Апрані лялек у нацыянальны касцюм”, “Перакладчыкі”.

Ганначка прынесла з сабою вырабы з саломы, дрэва, ткані. Дзеці разважалі пра беларускія рамёслы і пазнаеміліся з гульнёй “Прэла-гарэла”. Дзеці разам з лялькай Ганначкай і выхавальнікам здзейснілі анлайн-экскурсію па сталіцы Рэспублікі Беларусь, пазнаёміліся з галоўнымі славутасцямі горада Мінска. Завяршыўся беларускамоўны дзень гульнёй-віктарынай “Знаўцы Беларусі”, у якой дзве каманды дзяцей “Васількі” і “Каласкі” спаборнічалі ў ведах пра родную краіну.

Далучэнне выхаванцаў да роднай мовы, да нацыянальнай культуры развівае іх пазнавальныя і інтэлектуальныя магчымасці, пашырае веды пра беларускую культуру.

Намеснік загадчыка

па асноўнай дзейнасці

ДУА “Дзіцячы сад №1 г. Ганцавічы”

Дайнэка Юлія Ігараўна