З мэтай вывучэння і захавання гісторыі роднага краю, а таксама адраджэння і зберажэння матэрыяльнай, духоўнай і культурнай спадчыны вёскі 20 лістапада 1997 года на базе Дзяніскавіцкай сярэдняй школы адчыніў свае дзверы гісторыка-краязнаўчы музей, экспанаты якога прысвечаны мінуламу і сучаснаму вёскі Дзяніскавічы. Па кожнаму тэматычнаму раздзелу экспазіцыі музея падрыхтаваны і праводзяцца экскурсіі, пры гэтым улічваюцца ўзроставыя асаблівасці наведвальнікаў. Экскурсіі праводзяцца як для дарослых, так і для школьнікаў. Хочацца адзначыць , што праца ў музеі не стаіць на месцы. Пад умелым кіраўніцтвам Дзенісеня Таццяны Іванаўны, якая на сённяшні час з’яўляецца загадчыцай музея, на базе музея праводзяцца розныя тэматычныя, пазнавальныя і выхаваўчыя мерапрыемствы, працуюць гурткі «Юны экскурсавод» і «Краязнаўчы». Удзельнікі гурткоў на працягу доўгага часу праводзяць пошукавую і экскурсійную работу, збіраюць краязнаўчы і этнаграфічны матэрыял, які папаўняе экспазіцыі музея. І вось, радасная навіна, гісторыка-краязнаўчаму музею ДУА “Дзяніскавіцкі я/с-СШ” Ганцавіцкага раёна прысвоена званне “Народны музей”, адпаведнае пастанаўленне падпісаў Міністр культуры Рэспублікі Беларусь Ю.П. Бондар. Віншуем калектыў школы, адміністрацыю і кіраўніка музея!
А.А. Киселевич,
методист ГУМУ «Ганцевичский РУМК»